راہول گاندھی کا ماسٹر اسٹروک؟ جانیں کیوں کانگریس نے این سی کی قیادت والی جموں و کشمیر حکومت سے باہر رہنے کا فیصلہ کیا؟
سرینگر: شہربین ٹائمز _شبروز ملک/ اگرچہ کانگریس نے ریاست کا درجہ بحال کرنے کا وعدہ یاد دلا کر حالات کو سنبھالنے کی کوشش کی ہے۔ پارٹی کا کہنا ہے کہ وزیر اعظم نریندر مودی نے وعدہ کیا تھا کہ منتخب حکومت اور نمائندوں کے موجود ہونے کے بعد ریاستی درجہ بحال کیا جائے گا، اور چونکہ دونوں شرائط پورے ہو چکے ہیں، اس لیے اب وہ وزیر اعظم سے وعدہ پورا کرنے کا انتظار کر رہے ہیں۔ انڈین نیشنل کانگریس کے جنرل سیکریٹری جی اے میر نے دہرایا کہ کانگریس پارٹی نے مرکز سے جموں و کشمیر کی ریاستی حیثیت بحال کرنے کا پختہ مطالبہ کیا ہے۔
تاہم، این سی کی حکومت سے باہر رہنے کے اصل مقاصد آنے والے اسمبلی انتخابات کو قرار دیے جا رہے ہیں۔ کانگریس کے اندرونی ذرائع کے مطابق حکومت سے باہر رہنے کا فیصلہ ایک حکمت عملی کا حصہ ہے، جس میں مہاراشٹر اور جھارکھنڈ کے آنے والے بڑے انتخابات کو مدنظر رکھا گیا ہے۔
ذرائع کا کہنا ہے کہ نیشنل کانفرنس کا منشور آرٹیکل 370 کی بحالی پر مرکوز ہے، اور لوگوں نے اسی توقع پر ان کے حق میں ووٹ دیا۔ نیشنل کانفرنس کی حکومت پہلے اسمبلی سیشن میں ایک قرارداد پاس کر سکتی ہے جس میں 5 اگست 2019 کے واقعات کو غیر آئینی قرار دیا جا سکتا ہے۔ اگر کانگریس حکومت کا حصہ ہوتی، تو یہ قرارداد ملک کے دیگر حصوں میں کانگریس کے لیے نقصان دہ ثابت ہو سکتی تھی، اور بی جے پی اس معاملے کو قوم پرستی کے پلیٹ فارم پر استعمال کر سکتی تھی۔ حالانکہ کانگریس نے اس بات کا کھل کر اعتراف نہیں کیا، مگر پارٹی یہ مانتی ہے کہ اس فیصلے میں قیادت نے اس پہلو کو بھی مدنظر رکھا ہے۔
حلف برداری کی تقریب میں انڈیا بلاک کے کئی سرکردہ رہنماؤں نے شرکت کی، جن میں کانگریس لیڈر راہول گاندھی، اے آئی سی سی چیف ملکارجن کھرگے، جنرل سیکریٹری پرینکا گاندھی واڈرا، اکھلیش یادو اور ڈی راجہ شامل تھے۔ یہ صرف حلف برداری کی تقریب نہیں تھی بلکہ مہاراشٹر اور جھارکھنڈ کے انتخابات سے قبل انڈیا بلاک کی یکجہتی کا مظاہرہ بھی تھا۔
